Implicadas/as no desenvolvemento é unha ONG galega que nace no ano 1998 co obxectivo de concienciar á sociedade galega sobre os verdadeiras causas e consecuencias da pobreza no mundo, así como levar a cabo proxectos de cooperación ao desenvolvemento na India. Para acadar os nosos obxectivos, en Implicadas desenvolvemos por unha banda actividades de sensibilización en Galicia tales como conferencias, cursos, exposicións, recitais poéticos, clubs de cooperación, publicacións, edición de libros, etc., sempre en colaboración cos diferentes axentes sociais galegos e outras onegués. E pola outra banda, en Implicadas traballamos no Sur da India coas comunidades máis desfavorecidas, mediante proxectos de cooperación integrais, perdurábeis e con enfoque de xénero. Ao seren integrais, os proxectos céntranse en aspectos educativos, sanitarios e de autosuficiencia económica. Para que sexan perdurábeis en Implicadas colaboramos en pé de igualdade con organizacións locais (contrapartes) destas zonas, garantindo así a autosuficiencia da comunidade e o respecto cultural. O enfoque de xénero é o motor do traballo de Implicadas, xa que entendemos que non é posíbel erradicar a desigualdade entre persoas pobres e ricas mentres (en todo o mundo) permanece a desigualdade entre mulleres e homes. Para saber máis de nós podedes consultar a nosa web ou seguirnos en facebook.com e no twitter