O programa está dirixido a toda a poboación da comarca do Baixo-Miño, debido ó alto número de persoas con discapacidade que se atopan nesta zona, ademais de ser este o radio de acción do Centro San Xerome Emiliani, que é desde onde se levarán a cabo as principais accións polo desenvolvemento do dito programa. A finalidade primeira do programa é promover e potenciar a cultura da solidariedade na poboación e concienciar desta forma ás persoas das necesidades sociais e dificultades que se atopan as persoas con discapacidade e as súas familias, xa sexan dentro do domicilio como cara á sociedade. Desta forma preténdese chamar a atención do maior número de persoas posibles e facer así un chamamento ó voluntariado. As propias familias teñen un papel moi importante a desenvolver na concienciación e involucración da sociedade, xa que son elas as que viven o día a día e coñecen mellor ca ninguén a situación provocada e as necesidades sociais detectadas. O paso seguinte a seguir sería o de formar, orientar e apoiar ó voluntariado e ás propias familias das persoas con discapacidade. Dita formación levarase a cabo, mediante cursos, reunións informativas do funcionamento do programa; esta formación terá lugar no propio centro, nos diferentes colexios, asociacións, centros culturais dos concello da comarca. Dita formación levarase a cabo simultaneamente mediante a incorporación das persoas voluntarias ás actividades diarias do centro. Ademais as persoas voluntarias participarán á súa vez en novas actividades socioculturais, deportivas, etc., que se realizarán fóra do horario de atención ós usuarios e familias do Centro. A realización de tódalas actividades estarán en todo momento orientadas, apoiadas e coordinadas polo responsable de dito programa, que á súa vez manterá unha coordinación constante cos responsables do Centro.