Plans e programas

A Xunta de Galicia abre o prazo para inscribirse no Programa de voluntariado nos concellos con territorio dentro dos espazos protexidos de Galicia para paliar as consecuencias dos lumes do 2025.

A Xunta de Galicia abre o prazo para inscribirse no Programa de Voluntariado Ambiental Interxeracional en 22 espazos naturais da Comunidade. Esta iniciativa gratuíta ofrece un completo programa de actividades que impulsan o respecto e o coidado por un dos grandes tesouros de Galicia, o seu patrimonio natural.

Nesta quinta edición da iniciativa, posta en marcha polas Consellerías de Cultura, Lingua e Xuventude e a Consellería de Medio Ambiente e Cambio Climático ampliaranse os espazos naturais incluíndo as Paisaxes Protexidas e Humedais Protexidos. Serán un total de 28 actuacións que se levarán a cabo as fins de semana desde o 23 de maio ata o 12 de outubro. A primeira cita será no Parque Natural Complexo Dunar de Corrubedo e Lagoas de Carregal e Vixán e na Ría de Ribadeo e Praia das Catedrais.

O Programa Acompañamento nos Hospitais e Centros de Saúde, impulsado pola Consellería de Cultura, Lingua e Xuventude e a Consellería de Sanidade, é un proxecto de humanización que consiste no acompañamento, apoio e información, con persoas voluntarias, ás persoas usuarias que reciben asistencia sanitaria nalgún centro público sanitario do Servizo Público de Saúde, en coordinación coas diferentes xerencias das áreas sanitarias.

O programa está implantado en cinco das sete áreas sanitarias de Galicia: a de Lugo, a de Ourense, a de Vigo, a de Coruña e a de Ferrol, que contan con proxectos específicos para levar a cabo con persoas voluntarias.

A Dirección Xeral de Xuventude da Consellería de Cultura, Lingua e Xuventude, colabora novamente coa Dirección Xeral de Maiores e Atención Sociosanitaria da Consellería de Política Social e Igualdade no programa “Xuntos polo Nadal” que organiza esta última.

O obxectivo deste programa é que as persoas maiores que vivan soas poidan pasar acompañadas as festas do Nadal.

A Consellería de Cultura, Lingua e Xuventude, xunto coa de Medio Ambiente e Cambio Climático, convocan, un ano máis, o programa de Voluntariado Ambiental Interxeracional 2024 en 10 espazos naturais de Galicia. Nesta iniciativa, na que se realizan actividades que impulsan o respecto e o coidado do patrimonio natural galego, ofrécense 130 prazas e a participación é totalmente gratuíta.

Nesta cuarta edición serán un total de 10 actuacións as que se levarán a cabo durante as fins de semana de xullo a setembro.

A Consellería de Política Social e Xuventude, xunto coa de Medio Ambiente, Territorio e Vivenda, convocan, un ano máis, o programa de voluntariado ambiental interxeracional 2023 en 18 espazos naturais de Galicia. Nesta iniciativa, na que se realizan actividades que impulsan o respecto e o coidado do patrimonio natural galego, ofrécense 434 prazas, 164 máis que en 2022, e a participación é totalmente gratuíta.

En virtude do convenio de colaboración asinado coas tres universidades galegas (Santiago de Compostela, A Coruña e Vigo) os programas de voluntariado promovidos pola Consellería de Política Social e Xuventude terán recoñecemento académico mediante o sistema de créditos establecido no Real Decreto 1125/2003, do 5 de setembro, polo que se establece o sistema europeo de créditos e o sistema de cualificacións nas titulacións universitarias de carácter oficial. O obxectivo é seguir enriquecendo o currículo académico do alumnado a través da formación transversal que achega, neste caso a través da acción voluntaria como competencia clave para impulsar o futuro laboral da mocidade.

A Xunta de Galicia oferta no verán deste 2023 un total de 730 prazas en 46 campos de voluntariado (incluíndo as cinco quendas nas Illas Cíes) que se desenvolverán por todo o territorio galego, prazas que se suman ás ofertadas en campos noutras comunidades autónomas e no estranxeiro.

Neste programa, que se enmarca dentro da Campaña de Verán da Xunta de Galicia, poden participar as persoas mozas residentes en Galicia de 18 a 30 anos.

É necesario ter os 18 anos ao inicio do campo de voluntariado e non cumprir os 31 antes do seu remate.

Este programa permanece en activo dende o ano 2012, Ano Galego do Alzhéimer, e xorde coa idea de fomentar que a cidadanía teña un maior coñecemento e solidariedade cara ás persoas que padecen esta demencia e contribúa a garantirlles unha vida digna a estas persoas enfermas, na súa maioría persoas maiores.