Plan de formación no ámbito da acción voluntaria e do asociacionismo xuvenil 2025

O Plan está conformado por 3 cursos presenciais, 18 cursos en liña e 2 mixtos, cun total de 1.800 prazas.

Os cursos da área de voluntariado oriéntanse á dotación de ferramentas básicas para que, tanto o persoal técnico das entidades de acción voluntaria, como as persoas voluntarias que colaboran ou desexan colaborar con estas entidades, dispoñan dos coñecementos imprescindibles na materia para levar a cabo a súa labor de mellor xeito posible. Nesta ocasión os cursos desta área abarcan, ademais da formación básica en materia de voluntariado, diferentes temáticas coma o deseño e planificación de proxectos, lingua de signos, voluntariado interxeracional na área ambiental, no legado de experiencias e na conservación e enriquecemento do patrimonio lingüístico e cultural galego, cambio climático, idadismo, mellora da convivencia, xestión de equipos de traballo, así como a acción voluntaria no ámbito da educación regrada e do aprendizaxe-servizo.

Con respecto aos cursos da área de xuventude, estes están orientados á formación de profesionais do sector do ocio educativo e tempo libre, de persoal técnico que traballa coa mocidade e da mocidade en xeral. As temáticas dos cursos versan sobre deportes náuticos, primeiros auxilios, oratoria, comunicación efectiva, resolución de conflitos, uso das novas tecnoloxías, inclusión no lecer e formación das persoas delegadas de protección da infancia e da adolescencia.

Poderán participar nas accións formativas convocadas, as persoas maiores de 16 anos que teñan interese en obter coñecementos especializados en materia de acción voluntaria e asociacionismo xuvenil, atendendo ás especificacións que se indican en cada un dos cursos. As prazas outorgaranse por rigorosa orde de inscrición tendo en conta o dito con anterioridade.

Os formularios de inscrición (un por cada curso) estarán dispoñibles no campus en liña da páxina web de Voluntariado (www.voluntariadogalego.org) desde as 10:00 horas do xoves 13 de febreiro. O prazo de inscrición permanecerá aberto ata cubrir as prazas ofertadas en cada un deles.

Para acceder á plataforma de teleformación de voluntariadogalego.org, o alumnado que xa solicitara inscrición con anterioridade, deberá introducir o seu nome de persoa usuaria e contrasinal para solicitar a matrícula nos cursos que desexe.

As persoas que accedan por primeira vez e aínda non teñan conta de persoa usuaria creada nesta plataforma, terán que creala antes de solicitar praza (consultar manual do alumnado colgado no campus en liña).

É importante que, á hora de realizar a inscrición nun curso, a persoa indique se forma parte dalgunha entidade de acción voluntaria, de ocio educativo ou de tempo libre e se está en posesión dos correspondentes títulos oficiais de monitorado de tempo libre. Deben especificarse estes datos no apartado "outros datos", dentro do perfil da persoa usuaria.

Ligazón á  plataforma de teleformación de voluntariadogalego.og