Traballamos con persoas con problemas de saúde mental ou con trastornos mentais crónicos que presentan unha gran necesidade de apoio no seu proceso de rehabilitación e de integración na comunidade. As dificultades de integración no medio débense tanto á enfermidade que padecen (con forte estigma social), como á súa tendencia ao illamento e as dificultades que presenta o entorno social. As características de cada trastorno e de cada caso concreto son múltiples e moi variadas, pero o que é común a todas as patoloxías mentais é que afectan tanto de xeito individual coma social. O malestar e o deterioro producido por estas poden afectar a tódalas áreas vitais da persoa (laboral, social, persoal, familiar, etc.) polo que o tratamento debe ser contemplado de modo integral. Consideramos que a participación do voluntariado e a sensibilización da comunidade cara ós problemas de saúde mental contribuirá a ampliar o coñecemento e reducir o estigma social, ademais de ser unha poderosa ferramenta de cambio e fomento da participación activa da comunidade no movemento asociativo.