Unha quincena de voluntarios realizan tarefas de limpeza e coidado na Reserva da Biosfera mariñas coruñesas e Terras do Mandeo.
Belén do Campo subliñou que un dos obxectivos desta iniciativa é fomentar o respecto polo patrimonio natural que atesoura Galicia a través de accións de retirada de especies exóticas invasoras, limpeza ou catalogación, entre outras.
A directora xeral de Xuventude, Participación e Voluntariado, Cristina Pichel, e a directora xeral de Patrimonio Natural, Belén do Campo, visitaron á quincena de voluntarios que están a realizar tarefas de limpeza e coidado das Mariñas Coruñesas e Terras do Mandeo, ao abeiro do Programa de voluntariado ambiental interxeracional da Xunta de Galicia.
Esta é a segunda cita enmarcada nesta iniciativa autonómica despois de que a fin de semana pasado se celebrasen as primeiras actividades na Reserva de Biosfera Ribeira Sacra e Serras do Oribio e Courel e no Xeoparque Montañas do Courel.
Cristina Pichel explicou que esta iniciativa, que acada a súa segunda edición, ofrece un completo programa de actividades gratuítas que impulsan o coidado por un dos grandes tesouros de Galicia, o seu patrimonio natural. Así, esta fin de semana as persoas participantes eliminarán especies alóctonas e exóticas invasoras na contorna de Ponte do Porco e realizarán tarefas de limpeza e observación de aves e cetáceos na ruta Monumento Natural Costa de Dexo, entre outras actividades.
Pola súa parte, a directora xeral de Patrimonio Natural, Belén do Campo, incidiu en que a finalidade deste programa é potenciar e fomentar o respecto polo patrimonio natural de Galicia a través do impulso de accións de voluntariado nalgunha das súas “xoias medioambientais”. Neste sentido, subliñou a importancia que teñen este tipo de intervencións, que inclúen tarefas de eliminación de especies exóticas invasoras, limpeza ou catalogación de fauna e flora sobre o terreo, entre outras, para unha Comunidade onde, lembrou, o 42% do territorio está amparado baixo algunha figura de protección.
Nesta segunda edición da iniciativa, posta en marcha polas Consellerías de Política Social e de Medio Ambiente, Territorio e Vivenda, incrementáronse as prazas nun 18% ata acadar as 270 logo do éxito acadado por esta proposta na súa primeira edición. As actuacións levaranse a cabo todas as fins de semana ata o 11 de setembro.
Espazos naturais
Nos vindeiros meses están programadas unha vintena de accións nos seis parques naturais galegos —Baixa Limia-Serra do Xurés; Corrubedo e lagoas de Carregal e Vixán; Monte Aloia; Serra da Enciña da Lastra; O Invernadeiro; e Fragas do Eume—; no Parque Nacional marítimo-terrestre das Illas Atlánticas; en seis das sete reservas de biosfera que hai na Comunidade—Terras do Miño; Eo, Oscos e Terras do Burón; Ancares Lucenses e Montes de Cervantes, Navia e Becerreá; Mariñas Coruñesas e Terras do Mandeo; Xurés-Gêres; e Ribeira Sacra e Serras do Oribio e Courel—, así como noutros espazos protexidos relevantes como o Xeoparque Montañas do Courel.
En cada un deles o traballo dos participantes centrarase na realización de tarefas de limpeza, sinalización, eliminación de especies exóticas invasoras ou catalogación de fauna e flora. Ademais, o programa procura fomentar a cooperación e o traballo desinteresado desde unha perspectiva interxeracional.