Asociación de Busca e Salvamento de Galicia – en adiante, ByS Galicia - está constituída legalmente, o abeiro da Lei Orgánica 01/2002, como asociación; con personalidade xurídica propia e plena capacidade de obrar. Inscrita no rexistro central de asociacións da Xunta de Galicia, cun fin público e de interese xeral que beneficia á meirande parte da poboación dos resultados das súas actividades.

A Asociación fundouse no mes de Maio de 2014 co obxecto e fin fundacional de fomentar unha cultura de seguridade, a prevención de accidentes e a protección das persoas, realizando todas e cantas accións estean na súa man para poñer fin á perda evitable de vidas e aliviar o sufrimento.

As nosas persoas membro poñen a disposición da sociedade a súa experiencia e formación en materia de emerxencias para acadar o fin fundacional. Están organizadas en grupos de traballo pola súa área de especialidade, destacando os grupos de traballo de socorrismo e primeiros auxilios e emerxencias marítimas, tanto pola súa faceta formativa como a preventiva.

A nosa entidade ten un carácter non lucrativo e así está recollido nos estatutos, en tanto que o noso obxectivo en cada actividade é o de alcanzar o fin fundacional, non o de obter beneficios económicos ou realizar reparto de dividendos ó rematar o exercicio. Todos os ingresos recibidos, unha vez satisfeitos os gastos, se reverten na súa totalidade nas actividades da entidade. Ademais, o desempeño dos cargos da Xunta Directiva é de balde, con marcado carácter altruísta e solidario. Este feito está recoñecido pola Axencia Estatal de Administración Tributaria declarándonos entidade de carácter social.

Perseguimos un interese xeral e público, enfocados prioritariamente ó salvamento de vidas no mar, aínda que non e prestar axuda alí onde se nos necesite. Revertemos todos os nosos esforzos na sociedade, potenciando o desenrolo local e comunitario e actuando como auxiliares das administracións públicas no exercicio das súas competencias.

Por último, estatutariamente, se lle recoñecen ás persoas membro os dereitos e deberes recollidos na Lei 10/2011 de Acción Voluntaria, o que reforza o noso perfil solidario, altruísta e comprometido ca comunidade, facilitando a participación dos cidadáns en tarefas de protección civil, salvamento no mar e loita contra a contaminación. ByS Galicia está declarada como entidade de acción voluntaria e inscrita no rexistro correspondente da Xunta de Galicia.