Páxinas da videoteca

A Xunta de Galicia abre o prazo para inscribirse no Programa de Voluntariado Interxeracional “Rede Galega de Oficios Vivos”. Esta iniciativa gratuíta irá vencellada á recuperación dos oficios tradicionais, coa finalidade de mostrar, entre outros aspectos, as posibilidades de emprego e autoemprego dos mesmos.

Nesta primeira edición da iniciativa, posta en marcha pola Consellería de Cultura, Lingua e Xuventude, desenvolverase unha rede de xornadas ao longo de máis de 20 concellos das catro provincias galegas.

A Xunta de Galicia abre o prazo para inscribirse no programa Xuventude Consciente da Saúde Mental, programa a través do cal se poderá participar como axudante nun programa escolar dirixido á mocidade entre 13 e 17 anos no que o alumnado aprenderá e debaterá sobre saúde mental.

O Programa Acompañamento nos Hospitais e Centros de Saúde, impulsado pola Consellería de Cultura, Lingua e Xuventude e a Consellería de Sanidade, é un proxecto de humanización que consiste no acompañamento, apoio e información, con persoas voluntarias, ás persoas usuarias que reciben asistencia sanitaria nalgún centro público sanitario do Servizo Público de Saúde, en coordinación coas diferentes xerencias das áreas sanitarias.

O programa está implantado en cinco das sete áreas sanitarias de Galicia: a de Lugo, a de Ourense, a de Vigo, a de Coruña e a de Ferrol, que contan con proxectos específicos para levar a cabo con persoas voluntarias.

A Dirección Xeral de Xuventude da Consellería de Cultura, Lingua e Xuventude, colabora novamente coa Dirección Xeral de Maiores e Atención Sociosanitaria da Consellería de Política Social e Igualdade no programa “Xuntos polo Nadal” que organiza esta última.

O obxectivo deste programa é que as persoas maiores que vivan soas poidan pasar acompañadas as festas do Nadal.

Este programa permanece en activo dende o ano 2012, Ano Galego do Alzhéimer, e xorde coa idea de fomentar que a cidadanía teña un maior coñecemento e solidariedade cara ás persoas que padecen esta demencia e contribúa a garantirlles unha vida digna a estas persoas enfermas, na súa maioría persoas maiores.

Por que ser voluntario/a?

1. Fainos sentir mellor con nós mesmos/as.

2. Alimenta a creatividade.

3. Aumenta o grao de motivación e de autoestima.

4. Acrecenta o sentimento de pertenza.

5. Aporta habilidades de traballo en equipo.

6. Mellora as nosas capacidades profesionais.

7. Dá acceso ao Certificado de Experiencias Voluntarias, cada vez máis valorado no mercado laboral.